Кинескиот премиер Ли Кечијанг изрази надеж дека несогласувањата со администрацијата на американскиот претседател Доналд Трамп можат да бидат решени со меѓусебен договор и предупреди дека никој нема да има корист од трговска војна.
И покрај ветувањата на Трамп дека ќе наложи увозни давачки на кинеската стока, Ли наведе дека Пекинг има „стабилна и оптимистичка позиција“ за трговијата со САД.
Кинескиот премиер направи необичен чекор да се обрати до медиумите, без претходна подготовка, заедно со неговиот француски колега Бернар Казнев.
– Нека зборуваат бројките, нагласи Ли, посочувајќи ги работните места во САД, поврзани со американско-кинеската трговија.
– Веруваме дека со меѓусебно почитување и преку модел на соработка заснован на еднаквост, трговските проблеми можат да се решат на пријателски начин. Трговска војна меѓу Кина и САД не би била од корист за никого, истакна кинескиот премиер.