Европската комисија ја одобри процедурата за приватизација на грчкиот железнички оператор „Траиносе“ и наскоро ќе биде објавен тендер за продажба на компанијата, објави грчкиот весник „Етнос“.
– Со преструктурирањето на „Траиносе“ и претстојната приватизација компанијата нема повеќе да добива државни субвенции, се гарантира нејзино заздравување и развој и ја прави конкурентна во согласност со европските норми, се наведува во писмото од ЕК до грчките власти.
Грчкиот министер за инфраструктура, транспорт и информации Михалис Христохоидис истакна дека приватизацијата на „Траиносе“ „ќе донесе бенифиции за работењето на компанијата и нови инвестиции“.
Интерес за приватизирањето на „Траиносе“ покажа кинескиот гигант КОСКО, а на тендерот ќе учествуваат и руски и француски железнички компании. Интерес покажале и една романска и две американски компании.