Во Кина денеска беше пуштена во употреба најдолгата железничка пруга за брзи возови во светот, меѓу Пекинг и главниот административен центар на јужната провинција Гуандонг, градот Гуангџоу.
Вкупната должина на железничката пруга е 2.200 километри. Брзината на движење на возовите на новата линија достигнува 300 километри на час. Пуштањето во работа на линијата ќе го намали патувањето од Пекинг до Гуангџоу од сегашните 22 часа на 8 часа.
Кинеските власти изминатите години инвестираа големи средства во разгранување на железничката мрежа и изградбата на експресни железнички линии.
До 2015 година според планот на Државниот совет на Народна Република Кина треба да биде завршена изградбата на четири главни магистрали, кои ќе бидат дел од главната мрежа на брз железнички транспорт. Две од нив ќе ја поврзуваат земјата од исток кон запад и две од север на југ.
Со пуштањето во употреба на линијата Пекинг-Гуангџоу вкупната должина на експресни линии во земјата изнесува 9.300 километри. Според ова Кина го презема првото место во светот.