5 милиони евра од кои 3 од буџетот и 2 милиони со заем од Светската банка обезбеди Фондот за иновации за големи, среди и мали компании кои ќе може да аплицираат за грант од максимум 350 илјади евра, за да ги подобрат своите капацитети. Вицепремиерот Кочо Анѓушев рече дека при изборот на најдобрите проекти за иновативност, ќе одлучуваат две експертски комисии.
„Првиот филтер ќе треба да го поминат кај комисија составена од домашни експерти, а крајниот збор ќе го има втората комисија која е составена од 5 странски експерти. За средни претпријатија, кофинансирањето изнесува 60%, а останатите 40% ги дава компанијата, малите и микро претпријатијата добиваат помош со 70% со цел да ги охрабриме да ги подобрат своите ресурси. Крајната цел е овие компании да станаат конкуренти на пазарот, односно извозно ориентирани и препознаени на странските пазари“, рече Анѓушев.
Анѓушев појасни и дека целиот процес ќе го следи номинирана ревизорска компанија која ќе биде задолжена за тоа дали доделените средства се применуваат во согласност со предложениот проект.
Како што информираше директорот на Фондот за иновации, Јован Деспотовски, досега формуларот за апликација го пополниле околу 300 компании. Во однос на прашањето дали ќе се спроведува контролен механизам за вмешаност на функционери во сопственичката структура на компаниите, Деспотовски рече дека фирмата при поднесување на документите е должна да приложи изјава со која потврдува дека во сопственоста нема вклучен носител на јавна функција. Но, како што рече и доколку има, тие нема да бидат дисквалификувани, туку ќе бидат дополнително проверувани.
„Носител на јавна функција е широк поим и тука не спаѓаат само министри и заменик-министри. Доколку во некоја компанија има удел функционер, проценка на ризик за загрозување на проектот ќе се врши со посебен протокол, односно во соработка со експертски тим од ‘Транспарентност Македонија’. Доколку се утврди дека има ризик, тогаш компанијата ќе биде одбиена за грант. Знаете, овој механизам го воведовме да нема бранувања во јавноста, како што имаше по првиот повик, односно да бидеме транспарентни и одговорни“, рече Деспотовски.
Тој објасни дека во овој повик право на аплицирање имаат и приватни здравствени установи, ќе бидат отворени и канцеларии во Тетово, Струмица и Битола, за да им се помогне на компаниите од овие региони да се вклучат во проектот. Повикот е отворен до 15 мај, а проектот за кофинансирање ќе трае 24 месеци.
Габриела Димковиќ-Мишевска