Владата годинава ќе вложи окoлу 100 милиони евра во изградба и реконструкција на патиштата низ целата држава, информира денеска на прес-конференција владиниот портпарол Александар Ѓорѓиев.
Со Програмата за изградба и реконструкција на локални и регионални патишта во 2013 година се планира изградба и реконструкција на 133 локални патишта со должина од 162 километри во 70 општини низ државата за што се наменети 17 милиони евра, како и 11 регионални патишта со должина од 160 километри во што ќе бидат вложени 30 милиони евра.
Продолжувањето на интензивните инвестиции во патната инфраструктура преку изградба, реконструкција и модернизација на патиштата според Ѓорѓиев ќе значи придобивки и за граѓаните и за вкупниот економски развој на државата, а особено за градежниот сектор, за кој се отвора простор за поголем обем на работа и отворање работни места.
– Патиштата ќе се градат и реконструираат низ целата територија на државата, во секоја општина независно од составот на населението, нејзината големина или пак политичката припадност на градоначалникот, нагласи Ѓорѓиев.