Над 260 германски компании се уште се активни во Русија, со обрт од над 23 милијарди долари, пренесува германскиот јавен сервис АРД.
„Германските компании во 2022 година ѝ платиле на руската држава даноци во износ од 402 милиони долари“, пренесува АРД, повикувајќи се на податоците на School of Economics од Киев.
Според истите податоци, во моментов во Русија се активни 262 компании, кои во 2022 година оствариле промет од 23,2 милијарди долари.
По рускиот напад на Украина во февруари 2022 година, голем број германски компании ја напуштија Русија, но многу поголем број, околу две третини, останаа активни во таа земја.
Лани најголем промет со 3,4 милијарди долари во Русија оствари германскиот трговски концерн Метро. Претставници на оваа компанија објавија во Франкфуртер алгемајне цајтунг дека нивното работење во Русија не ги прекршува санкциите што Европската унија ги воведе кон оваа земја по почетокот на нападот врз Украина.
„Нашиот бизнис целосно ги исполнува условите наметнати од санкциите на ЕУ“, изјавија претставници на Метро, кои најавија дека ќе продолжат да бидат присутни во Русија.
Втората по големина германска компанија во Русија, енергетската компанија Унипер, најави неодамнешно заминување од оваа земја.
Западните компании максимално го користат својот приход преку продажба на тутун и алкохол
Според АРД, другите германски компании активни во Русија не ги прекршуваат санкциите на ЕУ. Од западните компании во Русија поактивни од германските компании се само американски компании кои во 2022 година оствариле промет од 40 милијарди долари и платиле 712 милиони долари данок во руската каса.
Од западните компании активни во Русија, најголемиот број од нив остваруваат приход преку продажба на тутун и алкохол, а предничат Japan International Tobacco и американскиот Philip Morris. Швајцарската Нестле е меѓу западните компании со најголеми приходи.