Поранешниот германски канцелар Герхард Шредер, кој ја водеше Владата во Берлин во периодот од 1998 до 2005 година, е новиот прв човек на гасоводот „Северен поток 2“, кој треба да носи руски гас во Германија и во други делови на Европа.
Весникот „Тагесшпигел“ денеска објави дека компанијата „Северен поток 2 АГ“ го потврдила именувањето на Шредер.
Како што јави дописникот на МИА од Берлин, Шредер во последниве 10 години, веднаш по заминувањето од канцеларската позиција, беше претседател на Собранието на акционери на компанијата, поради што дел од германската јавност го обвинуваа за судир на интереси.
Компанијата „Северен поток 2 АГ“ е во доминантна сопственост на рускиот енергетски гигант „Газпром“. Гасоводот „Северен поток 2“ е проект, кој „Газпром“ го реализира заедно со две германски и по една холандска и француска компанија.