Франција официјално побара од Европската комисија да започне контрола на увозот на автомобили од Јужна Кореја, што би било прв чекот кон можно повторно воведување на царини за увоз на јужнокорејските возила во земјите-членки на ЕУ.
Во писмото што францускиот министер за индустриски развој Арно Монтебург го упати до Европската комисија се наведува дека ваквото барање е во согласност со условите од Договорот за слободна трговија меѓу ЕУ и Јужна Кореја, кој дозволува „преземање безбедносни мерки при ненадеен раст на увозот во некои чувствителни сектори“.
Според Монтебург, ваквото барање следи поради фактот што само во текот на јануари и февруари бројот на увезени јужнокорејски возила во Франција се золемил за 50 проценти.
– Контролата ќе подразбира дека увозниците пред увезувањето на возила во Франција ќе мора да побараат одобрение од Комисијата. Тоа ќе ни овозможи да го процениме реалното влијание на Договорот за слободна трговија врз автомобилскиот сектор, изјави Монтебург.
Барањето на Франција следи откако минатиот месец Монтебург ги обвини јужнокорејските производители на возила дека ги продаваат своите автомобили на европскиот пазар по цени пониски од производните.
Наспроти растот на продажбата на јужнокорејски возила во ЕУ, најголемата француска автомобилска индустрија „Пежо“ во првата половина од годинава забележа загуба од 819 милиони евра и најави отпиштање на 8.000 работници.