Фолксваген на Саемот на автомобили во Женева ќе го претстави хибридот „ХЛ1“, кој има потрошувачка од 0,9 литри на 100 километри.
Изгледот на хибридниот двосед е во функција на аеродинамичноста, а резултат на тоа е низок коефициент на отпор на воздухот од само 0.186, што е основа за малата потрошувачка.
Аеродинамиката на ХЛ1 е постигната со замената на ретровизорите со камери, прекривањето на задните тркала и предните аголни ЛЕД светла. Потрошувачката е дополнително намалена со малата тежина од само 795 килограми и нискиот центар на гравитација на возилото.
Напредниот дизел-електричен „плаг-ин“ хибриден систем произведува вкупно 73 коњски сили и максимална брзина од 160 километри на час. Достапни се три различни видови на возење, електричен, дизел и комбиниран.
Во електричен систем, ХЛ1 може да помине околу 50 километри благодарение на литиум-јонската батерија. Структурата на автомобилот е од лесен карбон, а димензиите изнесуваат 3,8 метри должина, 1,6 метри широчина и 1,1 метар висина.
Деталите за цената се уште не се познати. Компанијата планира за почеток да произведе 50 примероци, врз основа на што ќе одлучи дали е еконмски оправдано да почне со масовно производство.