Европската централна банка (ЕЦБ) ќе продолжи да им дава итна ликвидна помош на грчките банки, изјави денеска на прес конференција претседателот на оваа институција Марио Драги, цитиран од ДПА.
Плафонот на програмата ЕЛА (Emergency Liquidity Assistance – ELA), по која се обезбедува оваа помош, ќе се зголеми за 900 милиони евра од досегашните приближно 90 милијарди евра, посочи тој.
По договарањето на новиот спасувачки план меѓу Атина и нејзините партнери од еврозоната повторно се присутни условите за помагање на Грција преку програмата ЕЛА, рече Драги.
-Сега ситуацијата е поразлична. Имавме серија новости – одобрението на пакетот за премостено финансирање, гласањата, различни гласања во различни парламенти, што ги обнови условите, неопходни за зголемување на ЕЛА, посочи Драги.