Доларот нагло падна, пораснаа цените на нафтата

Од:

На азиските берзи цените на акциите силно пораснаа, како и вчера на Волстрит, бидејќи инвеститорите беа охрабрени од податоците за забрзување на закрепнувањето на кинеската економија, како и за ублажување на инфлацијата во САД. Индексот MSCI на азиско-пацифичките акции, без јапонските акции, беше во плус 1,9 отсто за околу 7 часа. Истовремено, јапонскиот индекс Никеи зајакна за 2,6 отсто, додека цените на акциите во Шангај, Австралија, Јужна Кореја и Хонг Конг пораснаа меѓу 0,4 и 3,1 отсто.

Азиските инвеститори беа охрабрени од подобрите од очекуваните податоци од кинеската економија, кои укажуваат на забрзување на закрепнувањето од кризата со коронавирусот. Индустриското производство порасна во октомври на годишно ниво за 4,6 отсто, побрзо од 4,5 отсто во септември.

Прометот во трговијата на мало во октомври скокна за 7,6 отсто на годишна основа, додека еден месец претходно растот беше 5,5 отсто. Аналитичарите очекуваат дополнително забрзување на растот, имајќи предвид дека кинеската централна банка ја зголемува ликвидноста во финансискиот систем, што треба да го стимулира кредитирањето.

Акциите се поддржани и од надежите за напредок во преговорите за отворените економски прашања меѓу САД и Кина на средбата меѓу претседателот Џо Бајден и Кси Џинпинг во Сан Франциско.

Инвеститорите беа охрабрени и од вчерашниот силен раст на цените на акциите на Волстрит. Dow Jones зајакна 1,4 отсто, додека S&P 500 скокна за 1,9, а Nasdaq индексот 2,4 отсто. Најголемиот дневен скок на тие индекси од април беше благодарение на подобрите од очекуваните податоци за инфлацијата во САД.

Извештајот објавен вчера покажа дека во октомври стапката на инфлација била 3,2 отсто, помалку од 3,7 отсто во септември и помалку од 3,3 отсто што очекуваат аналитичарите.

Од март минатата година, ФЕД ги зголеми клучните каматни стапки за 5,25 процентни поени за да ја ограничи инфлацијата. Сепак, на последните две седници челниците на ФЕД ги оставија каматните стапки непроменети, па инвеститорите сметаат дека циклусот на поскапувања на парите е завршен, иако од ФЕД велат дека е можно дополнително заострување на монетарната политика.

Во наредниот период, движењата на пазарот ќе зависат главно од шпекулациите за тоа кога ФЕД би можел да започне со намалување на каматните стапки. По новите податоци за инфлацијата, се интензивираа шпекулациите дека првото намалување на каматните стапки на ФЕД би можело да следи во мај следната година.

И на валутните пазари вредноста на доларот во однос на кошницата валути нагло падна, по извештајот за инфлација. Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 104,15 поени, додека вчера во ова време изнесуваше 105,70 поени.

Истовремено, курсот на доларот во однос на јапонската валута се лизна од вчерашните 151,70 на 150,55 јени. Американската валута ослабе и во однос на европската, па цената на еврото достигна 1,0870 долари, додека вчера во ова време беше 1,0695 долари.

Цените на нафтата, од друга страна, пораснаа. Цената на барелот на лондонскиот пазар утрово зајакна за 0,33 отсто, на 82,75 долари, додека на американскиот пазар цената на барелот порасна за 0,27 отсто, на 78,45 долари.

Би можело да ве интересира

Падна вредноста на доларот

Доларот зајакнува петта недела по ред

Светски берзи: Доларот ослабе, цената на нафтата порасна

Катерина Ѓуровски

Светски берзи: Зајакнат доларот, цената на нафтата порасна

Доларот зајакна, цената на нафтата порасна

Катерина Ѓуровски

Доларот зајакна, цената на нафтата расте