Грција на кредиторите им испрати детален предлог со реформи, соопшти денеска грчкиот премиер Алексис Ципрас и ги повика европските лидери да го прифатат планот за да биде склучен долгоочекуваниот договор, јави дописникот на МИА од Атина.
– Грчката Влада преговара со план и стратегија и поднесе конкретни предлози. Дилемата сега е кај раководството на Европа. Преговараме со план и стратегија во тешки услови…Грција излезе со предлози, направивме отстапки – што е нормална практика во преговори, но поднесовме реален план за излез на земјата од кризата, рече Ципрас.
Според него, „исходот од преговорите ќе го означи крајот на поделбата на Европа“. Тој истакна дека „сега е јасно оти одлуката за тоа дали тие сакаат да се прилагодат на реализам и за излез од кризата без поделба на Европа им припаѓа на европските лидери“.
– Тоа не е само грчки проблем, тоа е европски и глобален проблем. Дилемата е меѓу реална опција за излез и поделба на Европа. Владата се движи со план и одлучност, и врз основа на огромното мнозинство на грчкиот народ, кој сака решение и не сака земјата да се врати на претходниот период на меморандуми, рече Ципрас.
Европските лидери и шефот на Меѓународниот монетарен фонд синоќа во Берлин одржаа вонреден состанок на кој разговараа за начините како да се избегне банкрот на Грција и се согласија да се интензивираат разговорите за судбината на земјата. Според извори запознаени со содржината на состанокот, целта на средбата била да се состави понуда која Грција може да ја разгледа во наредните денови.
Некои светски медиуми, од кои повеќето германски, денеска јавија дека до Атина е испратен нацрт-договор, кој всушност претставува конечен предлог од страна на кредиторите. Грчката Влада демантира дека добила предлог-договор од страна на кредиторите.