Зајакнување и развој на економските односи, унапредување на бизнис релациите меѓу Македонија и Бугарија, како и постојано стимулирање на деловните и општествени иницијативи ќе бидат во фокусот на активностите на Бугарско-македонскиот бизнис клуб (БМБК) кој беше промовиран денеска во Скопје.
На промоцијата на која присуствуваше и бугарска делегација предводена од потпретседателката на Бугарија Илијана Јотова во чиј состав беа повеќе стопанственици, претседателот на клубот Никола Поп-Илиев истакна дека формирањето на ваков клуб следи по констататцијата дека во делот на економската соработка меѓу двете земји има големи празници кои треба да се пополнат.
– Го користиме позитивниот тренд на меѓусебните односи кој го поставија претходните политички гарнитури, актуелните премиери на Македонија и на Бугарија, како и целокупното бугарско и македонско општество, а последно време и верските заедници. Оценивме дека е момент да дадеме и ние придонес кон подобрување на нашите односи и во сегментот на економската сфера, рече Поп-Илиев.