Српската Влада во почетокот на февруари би требало да разгледа кусорочни мерки за опоравување на српскиот авиопревозник, пишува денеска српскиот весник „Блиц“.
Според весникот, работната група за анализа на состојбата и подготовка на предлози за стабилизација и заздравување на „Јат ервејз“ овие денови подготвува како кусорочни мерки, така и долгорочна стратегија која би требало конечно да го реши прашањето за судбината на оваа компанија.
Мерките кои работната група наскоро ќе и ги понуди на Владата се однесуваат на тоа – дали „Јат“ треба и натаму да биде национален авиопревозник или нискобуџетна компанија, тврди изворот на „Блиц“.
Исто така, појасно ќе се одреди и во однос на тоа што всушност е она што оваа компанија профитабилно може да го работи, дали е исплатливо да се размислува и натаму за интерконтинентални летови или ќе се преориентира на пазарот во опкружувањето.
Според неофицијалните проценки, авиокомпанијата не би требало да има над 600 вработени. Во моментот бројот на вработени е 1.300.