Во декември 2022 година министерот за транспорт и врски, Благој Бочварски и премиерот Димитар Ковачевски на заеднички настан најавија асфалтен бум и отворање на автопатот Кичево-Охрид кој се гради десет години.
Но, ниту патот не е завршен, ниту пак некој ќе понесе одговорност што деценискиот проект ги чини граѓаните досега околу 600 милиони евра, а тие се уште возат по стариот, оштетен и небезбеден пат Кичево – Охрид.
„А1он“ испрати неколку прашања до кабинетот на министерот за транспорт и врски, Благој Бочварски, но наместо конкретни одговори до медиумот кој му се обраќа, тој одлучи да ги образложи проблемите преку заедничко соопштение до јавноста.
„Во овој момент, во тек е ревизија од Државниот завод за ревизија во Јавното претпријатие за државни патишта во однос на финансиските извештаи и услогласеност како и ревизија за успешност на капиталните инвестиции.
Министерството за транспорт и врски и ЈП за државни патишта, преку Надзорниот орган ангажира експерт за Фидик договори преку кој треба да се обезбеди анализа на договорот како и решенија за сите идни чекори на Владата за реализација на проектот за изградба на автопатската делница Кичево – Охрид.
Ова е потребно од причина што рокот за реализација на овој инфраструктурен проект завршува на 31 декември оваа година, а до тогаш Министерството за транспорт и врски и ЈП за државни патишта преку Владата ќе донесат одлука со најсоодветното решение за дореализација на овој проект. Дополнително, информираме дека појавени се единесет нови свлечишта на трасата и поради тоа ќе се ангажираат меѓународни експерти кои ќе дадат предлог проектански решенија и мислење за целокупниот проект“, стои во соопштението од Министерството.
Освен информацијата дека се појавиле 11 нови свлечишта на трасата, која инаку беше планирана пред десетина години и никој од власта во последните седум години не забележа дека изведувачот има сериозни проблеми, нема одговор на прашањата за тоа до каде е фактичката состојба на патот, дали ќе се раскине договорот со кинеската компанија „Сино Хидро“ и колку тоа ќе ги удри граѓаните по џебот.
Министерот не одговори ниту дали ќе си поднесе оставка затоа што ланското ветување не е остварено, ниту пак кој смета дека треба да понесе одговорност што граѓаните чекаат десет години да се изградат 50 километри автопат.