Со 51 глас „за“, ниту еден „против“ и 25 „воздржани“ Собранието на Република Македонија денеска ја усвои одлуката за прераспределба на 1,6 милијарди денари меѓу буџетските корисници на централната власт и меѓу фондовите.
Министерот за финансии Драган Тевдовски во Собранието образложи дека финансиите се кратат од ставки кои нема да бидат реализирани, а средствата ќе се користат за отплата на наталожени обврски.
Со овие пари, рече Тевдовски, се планира исплата на неколку заостанати долгови како за Македонската филхармонија, опрема во МВР, градежни објекти во СОЗР – Факултетот за драмски уметности, Албанскиот театар и библиотеката во Тетово.
– Со оваа отплата на дел од наследените долгови ќе се обезбедат заштеди во следните 10 години како резултат на избегнување на плаќање на камати и евентуални судски трошоци за ненавремено подмирени обврски, рече Тевдовски.
Оваа промена ја поддржаа и од ВМРО-ДПМНЕ, координаторот на една од десетте пратенички групи на партијата, Илија Димовски, кажа дека дека крајната цел на одлуката е во ред бидејќи со неа ќе се овоможи 50-ина милиони евра да влезат во стопанството. Но, напомена дека одлуката е првата целосна дијагноза на Владата на СДСМ за слабостите во планирањето и реализирањето на средствата.
Виктор Јованов