„Ги вкрстуваме патиштата и чекориме заедно” е мотото на завршната вечер на годинашното второ издание на Филмскиот фестивал за млади „Џифони Македонија”.
Програмата што ја понуди фестивалот во изминатите пет дена, на младите учесници од категориите +10, +13 и +16 години им овозможи на интересен и забавен начин да дознаат повеќе за себе, за другите, за пријателството, филмот и културата воопшто.
Агенцијата за филм на Република Македонија и Здружението за ширење на филмската култура Џифони – М во рамките на фестивалот ги вклучува и децата од Домот без родители „11 Октомври“. Дваесет и пет деца од Домот денеска бесплатно во киното Синеплекс ќе го проследат филмот „Exit Marrakech“, а уште 20 деца заедно со младите 10+ во Кинотеката на РМ филмот „The Great Bear“.
Свеченото затварање најавено за 20 часот во кино „Милениум“ ќе биде посветено на младите кои се креатори на фестивалот, нивните дела и самостојни креации создадени на работилниците во Џифони и на хуманитарна акција за децата од Домот без родители „11 Октомври”.
– Младите дел од Џифони Македонија ќе ја покажат својата хуманост како највозвишена човекова особина преку донација на средствата кои ќе бидат собрани од продажбата на своите дела и креации создадени во текот на петте фестивалски дена и преку самостојни донации, соопшти Агенција за филм на Република Македонија.