Со претставата „Го играме Чехов” во изведба на младите актери од Крива Паланка и Благоевград, Бугарија, синоќа беше спуштена завесата на годинашниот Меѓународен театарски фестивал „Св.Јоаким Осоговски“ во Крива Паланка.
Претставата е копродукција на Центарот за аудиовизуелни уметности од Крива Паланка и благоевградскиот младински театар „Проф. Енчо Халачев“ од Бугарија, во режија на Бранимир Митов од Благоевград и Глигор Цветковски од Крива Паланка.
– Чест е младинците од нашиот град да се претстават и настапат на истата сцена каде изминатите девет години продефилираа стотици врвни глумци. Одиграа раскази од Антон Павлович Чехов, во една двојазична, македонско-бугарска кохезивна драматуршка постановка, изјави режисерот Цветковски.
Фестивалот започна на 14-ти септемри, на сцената на кривопаланечкиот центар за култура во деветте фестивалски вечери настапија осум театарски ансамбли од Македонија, Хрватска, Србија и Бугарија, а за лауреат на годинашното издание беше прогласен театарскиот деец со потекло од Крива Паланка,Гоце Ристовски.