Со изведба на претставата „Циклус Македонија“ и доделување на наградите, синоќа на плоштадот „Гоце Делчев“ во Пустец, Албанија, заврши 10-тиот фестивал Македонско културно лето.
Како што информира Здружение „Сонце“, награди за актерка и актер на фестивалот добиле Зорица Панчиќ од претставата „Театар, љубов моја“ и Фаик Мефаиловски од претставата „Синиот портокал“ – двете во продукција на театарот „Јордан Хаџи Константинов Џинот“ од Велес.
Театарот за деца и младинци од Скопје добил награда за колективна актерска игра за претставата „Гига мега бајка“. Специјална награда за колективна актерска игра им е доделена на актерите на Народен театар Слојштица за претставата „Приказните на заборавените предци“.
Одлуката за наградите ја донесе фестивалското жири во состав: Анастас Тановски (претседател) и Владимир Тулиев и Едмонд Сотир (членови).
Здружението „Сонце“ соопшти дека директорот на фестивалот Едмонд Сотир им врачил признанија за поддршка на македонската култура на заменик-министерот за култура Владимир Лазовски, на градоначалникот на Пустец, на претставници на Општина Велес, Град Скопје и на компании.