Со предавањето на Ариане Шпаниер од Германија, насловено „Современиот дизајн и независните издавачки практики како глас на маргините“, вечер од 19.30 часот во Чифте амам ќе почне вториот дел на четвртиот Фестивал за критичка култура-КРИК што го организира „Контрапункт“. Коорганизатор на предавањето е здружението „Проектен простор Прес ту егзит“.
Четвртото издание на фестивалот, годинава на тема „Човек без својства – политики на маргините“, ги спојува различните дискурзивни, уметнички, општествени, активистички и политички практики низ кои критички ги истражува и презентира алатките, размислите и дејствувањата преку кои ќе може да се создадат новите текстови на културата и уметноста.
– Оваа година „КРИК – фестивал за критичка култура“ се одвива како процес низ неколку етапи во годината. Особено ни е важно прераснувањето во платформа и форум за критичка култура, низ која, во постојан разговор и конфронтација се сите можни алтернативи на промислување на општеството, политичкото, културата…, велат програмските уредници и организатори, Искра Гешоска и Артан Садику.
Првиот дел на КРИК се одржа во текот на јуни. До крајот на четвртото издание на Фестивалот ќе гостуваат и познатите филозофи и теоретичари Борис Буден, Бранислав Димитријевиќ и Стефан Новотни, како и домашни учесници.