Во софиската галерија „Париз-Москва“ синоќа беше отворена изложбата „Трансформација“ од македонскиот скулптор Жарко Башески.
Авторот се претстави со три скулптури кои предизвикаа изклучителен интерес и внимание од публиката во Софија. „Обичниот човек“, „Автопортретот“ и најновото дело „Езекил 2“, ликовната критика во Бугарија смета дека се вистинско откритие и нешто сосема ново од уметничкиот правец хипереализам, кој Башевски го негува со посебен сенс и умешност, информираат од Културно-информативниот центар на Македонија.
Жарко Башески и неговите дела беа претставени од уметничките директори на софиската галерија Момчил Трајков и Јулија Савова, а изложбата ја прогласи за отворена директорот на македонскиот културно-информативен центар Васко Шутаров.
Изложбата „Трансформација“ беше реализирана во соработка со Музејот на современа уметност од Скопје и ќе биде поставена до 5 октомври.