Група млади дизајнери во соработка со НУ Народен театар-Битола денеска дизајнираа и креираа „Ѕид на уметноста“ посветен на првото издание на „Битола Шекспир фестивал“ што од 19 до 25 јули ќе се одржува на театарските сцени во Хераклеја и Центарот за култура.
На ѕидот на уметноста презентирани се театарски плакат со најголем дел од претставите на Шекспир одиграни на сцената на Битолскиот театар, пораки од артисти, театарски наслови и фестивали посветени на Вилијам Шекспир во светот.
– Битолскиот театар со 21 претстава е рекордер по бројот на одиграни театарски претстави на Шекспир во Република Македонија. Ѕидот на уметноста кој е во непосредна близина на Клубот на актерите ќе биде осветлен, грижливо ќе се чува и одржува, но и обновува со нови содржини. Тука е плакатот за претставата „Ноќ спроти водици“ од 1983 година, театарски плакат од други периоди на театарот, катче посветено на починатиот режисер Владо Цветановски, и други креации, посочуваат од НУ Народен театар-Битола.
Во пресрет на првото издание на „Битола Шекспир фестивал“ кој се одржува под покровителство на Министерството за култура, а во рамките на „БитФест“ утре во Битола ќе се одржи прес конференција на која ќе говори директорот Валентин Светозарев.