Третиот фестивалски ден на Интернационалниот фестивал на филмската камера „Браќа Манаки“ ќе биде отворен со програмата за деца и проекцијата на данскиот филм за деца „Мини и комарците“ во режија на Јаник Хаструп и Флеминг Мулер.
Според програмата, точно напладне ќе се одржи мастер-клас во чест на годинашниот добитник на златната „Камера 300“ за животно дело, францускиот кинематографер Пјер Лом, а во текот на денот ќе бидат емитувани и романскиот филм „Посредник“, кинескиот филм „Кинески Ван Гог“, како и филмовите што конкурираат за главните фестивалски награди односно босанско-македонската продукција на филмот „Жаба“ на Дејан Димески и Елмир Јукиќ и германскиот филм „Од ништо“ на Фатих Акин во кој кинематографер е Рајнер Клаусман.
На 38. „Браќа Манаки“ со посебна програма се слави и одбележува 90 годишнината од раѓањето на познатиот македонски филмски, театарски и телевизиски режисер Димитрие Рули Османли и во негова чест ќе биде емитуван филмот „Жед“.