Прва изложба на студентите од Факултетот за дизајн и технологии на мебел и ентериер ќе биде отворена вечер во Музејот на Град Скопје и ќе може да се посети до 2 јуни.
Ќе бидат претставени повеќе од 200 цртежи и макети со кои студентите – идни дизајнери на мебел и ентериер ќе ѝ го претстават на јавноста изработеното во текот на студиите од предметите: Стилови и декорација, Ликовно изразување со пластично обликување, Перспектива, Композиција, осветлување и бои, Проектирање – основи и реализација, Индустриски дизајн – современи движења и Резбарство.
Факултетот за дизајн и технологија на мебел и ентериер е единствена високообразовна и научно-истражувачка установа од областа на технологијата на дрво и дизајн на мебел и ентериер. Основан е во 2010 година како следбеник на четиридецениската традиција на студиите од областа на дрвната индустрија, механичката технологија на дрвото и проектирање мебел и ентериер, што до учебната 2009/2010 година се организираа на студиските програми на Шумарскиот факултет при УКИМ.
На свеченото отворање на изложбата вечер од 19 часот ќе се обратат деканот, проф. д-р Зоран Трпоски, и градоначалникот на Гази Баба, Борис Георгиевски.