Превентивна заштита на музејските експонати од штетници, втора фаза од осовременување на депоата, конзервација на керамички материјал од археолошката збирка и конзервација на метални предмети се само дел од проектите одобрени во Годишната програма за работа на националните установи на Министерството за култура за Музејот „Д-р Никола Незлобински“.
Директорот на Музејот Милован Шутиноски денеска информира дека одобрен е и проектот за изработка на елаборат за ревалоризација на збирката уметнички дела од Вангел Коџоман, замена на експонатите од постојаната изложба со нови на тема „Лековитите растенија на планината Јабланица“, а предвидени се и едукативни работилници „Рибите во Охридското Езеро“ и „Културно наследство од Струга и Струшко“, како и изработка на промотивен и рекламен материјал.
– Проектите кои се поддржани ги опфаќаат сите одделенија на Музејот, внимание е посветено на заштита на музејските збирки и експонати. Постојано ќе биде надоградувана едукативната функција на музејот, а се работи и на негова промоција и богатото природно и културно наследство кое го содржи и претставува Музејот „Д-р Никола Незлобински“, истакна Шутиноски.
Тој посочи дека предвидени се и други активности со кои ќе се збогати културната понуда на Музејот, а работат и на вмрежување на национално и меѓународно ниво од каде што очекуваат нови соработки и проекти во интерес на богатото природно и културно наследство на Струга и на Република Македонија.