Уметницата Кристина Зимбакова од Струмица вечер на планината Родопи во Бугарија ќе постави самостојна изложба насловена „Светилиште“.
Изложбата ќе биде поставена на отворено, во експериментална стаклена витрина-галерија „Расклон“, во источните предели на планината Родопи. Местото е на 500 метри надморска височина, на крстосница од шумски пат и во близина на грчката граница.
Ова не е прва ваква изложба на Зимбакова, поставена во природа. Лани во јуни постави изложба и на планината Беласица, на врвот Сечена Скала, висок 1740 метри, на самата гранична линија меѓу Северна Македонија и Грција.
Кристина Зимбакова во своето творештво негува интердисциплинарен пристап каде се испреплетени сликарството, поезијата и природните науки, а габите и лишаите се најзастапен медиум.
Досега имала самостојни изложби во земјава, како и во Ирска, а учествувала на бројни групни изложби во Оксфордскиот театар во Англија и Музејот за уметност „Ешкенази“ во САД.
Настанот е во организација на холандско-бугарската уметничка Фондација „Царино“, а ќе трае до 2 декември.