„Бикини Мун“ на Милчо Манчевски освои Специјална награда на жирито на фестивалот „Фантаспорто“ во Порто, Португалија, што е прва награда за неговиот петти игран филм. На „Фантаспорто“ Манчевски пред две години беше лауреат на наградата за животно дело, соопшти „Банана филм“.
„Бикини Мун“ премиерно игра во САД, каде завчера имаше американска премиера на фестивалот „Синеквест“ во Сан Хозе, Калифорнија.
– Филмот доби одлични рецезии по премиерата на „Синеквест“: „’Бикини Мун“ е воодушевувачки брилијантен филм“, „Целосно свежо и оригинално дело на режисерски маестро“, „Ова е филм каков што ‘Обликот на водата’ сакал да биде, ама не знаел како“, напиша меѓу другото американската критика, наведува „Банана филм“.
Американско-германската копродукција „Бикини Мун“ на „Синеквест“ ќе биде прикажан четири пати во програмата „Живот“, која го најавува филмот со зборовите „Царствата на умот се бескрајни и чудесни“.
Реномираниот „Синеквест“ е избран за најдобар филмски фестивал од читателите на „УСА тудеј“ и се одржува во Силиконската Долина.
Во текот на март „Бикини Мун“ ќе игра и на еден од најголемите американски фестивали на независен филм во Сарасота, а во Европа ќе се прикаже и на фестивалот во Софија и Истанбул.