Прилепскиот театар „Војдан Чернодрински“ вечер премиерно ќе ја изведе претставата „Сонот на Цепенков“, според нашиот собирач на македонски народни умотворби Марко Цепенков, а во режија на Кирил Петрески. Ова е прва премиера за годинава и првпат ќе биде поставена кореодрама.
Според режисерот Петрески, ова е доказ дека Цепенков може да се раскаже поинаку.
– Ова е поинаков театар, со многу кореографија и движења. Затоа претставата трае и неполн час. Искуството при работата на претставата е незаменливо. Оставаме на публиката да го каже конечното мислење, истакна на вчерашната средба со новинарите режисерот Петрески.
Кореографијата е на Кире Миладиноски од студиото „Зодијак“, музиката на Чалгија саунд систем. Во претставата играаат Марија Спиркоска Илијоска, Игор Трпче, Даниела Иваноска, Зоран Иваноски, Никола Настоски, Јасмина Мицовска-Станкоска, Александар Тодески, Димитар Црцороски, Катерина Чакмакоска.
Прилепскиот театар годинава планира пет премиери, од кои три се со финансиска поддршка на Министерството за култура.