Во објектот „Порта Македонија“ во Скопје денеска ќе биде отворен меѓународниот научен симпозиум „Денови на Јустинијан I“ на тема „Самуиловата држава и Византија: Историја, култура, легенда, традиција“ во организација на Универзитетот „Евро-Балкан“ и Универзитетот во Болоња, а со финансиска поддршка на Министерството за култура на Република Македонија во партнерство со Италијанската амбасада во Скопје.
На симпозиумот ќе се обратат проф. д-р Митко Б. Панов, претседател на меѓународниот организациски и научен комитет на Симпозиумот и италијанскиот амбасадор Ернесто Масимино Белели. Симпозиумот официјално ќе го отвори министерката за култура Елизабета Канческа–Милевска.
На отварањето ќе биде промовиран и Зборникот на трудови од минатогодишниот симпозиум „Денови на Јустинијан I”.
Во работниот дел свои реферати ќе имаат повеќе од 50 еминентни професори и научници од 15 земји (Австралија, Австрија, Бугарија, Грција, Израел, Италија, Либан, Полска, Романија, САД, Србија, Холандија, Хрватска, Шпанија, Македонија). Ќе бидат презентирани и најновите сознанија од областа на византолошките и средновековните студии, што го вклучува и феноменот на легендите, митовите, традициите, сфатен како интегративна компонента на европското наследство. Сеопфатниот тематско-содржински концепт на рефератите меѓу другото ќе ја претстави Република Македонија како интегрален дел од византиските културни и духовни традиции и наследство.
Симпозиумот „Денови на Јустинијан I” претставува дел од партнерската програма помеѓу Универзитетот „Евро-Балкан“ и Универзитетот во Болоња и кампусот во Равена, во функција на продлабочување на севкупната соработка помеѓу Македонија и Италија.