Во уметничката галерија „Безистен“ во Штип синоќа свечено беше отворена најстарата културна манифестација Штипско културно лето.
Павле Аксентијевиќ и групата „Запис“ од соседна Србија имаа концерт на стара црковна и византиска музика. Градоначалникот на општина Штип, Илчо Захариев рече дека штипјани уживаа во музиката на познатиот Акентијевиќ, кој е добитник на низа награди.
Познатиот српски пејач, Аксентијевиќ изјави дека му е задоволство што синоќа се претставил пред штипската публика, а досега како што рече пеел во низа сали низ Европа и светот, но според него најдобра акустика има во црквата „Света Софија“ во Охрид.
Штипско културно лето продолжува во текот на наредниот месец, а секоја вечер штипјани можат да бидат дел од низа содржини од областа на музиката, театарот и ликовната уметност.
Штипско културно лето се одржува по 28-ми пат, а годинава официјално ќе биде затворено на 2 август.