До крајот на 2015 година целосно ќе биде санациран Споменикот на паднатите борци од НОВ од Велес и Велешко.
Министерството за култура соопшти дека Националниот конзерваторски центар, во изминатиот период реализирал повеќе активности во насока на зачувување на ова значајно спомен-обележје кое е симбол на Велес. Биле изведени и превентивни активности за елиминирање на прокиснувањето, кое како проблем се провлекува долги години. Извршено е интервентно санирање на екстериерот, промена на оштетените делови и поставување нов плексиглас.
Споменикот на паднатите борци од НОВ од Велес и Велешко е еден од најголемите споменични комплекси во Македонија, изграден во периодот 1979/81 година во чест на загинатите борци во НОВ и жртви на фашистичкиот терор од овој регион. Во 1981 година објектот е ставен под заштита како споменик на културата од прва категорија.
Автори на скулптурно – архитектонското решение на Спомен-костурницата се Љубомир Денковиќ и Саво Суботин, а современиот македонски сликар Петар Мазев е автор на мозаичните композиции, кои се наоѓаат во внатрешноста на објектот.