Романот „Зад аголот”, најновата книга на Томислав Османли, идната година ќе биде објавен во Турција во издание на „Есен Китап” од Истанбул, во тираж од 3.000 примероци.
– Многу сме среќни и нестрпливи да го видиме ова книжевно дело објавено на турски. Ова е инаку првпат да објавуваме книга на автор од Македонија. Цел на „Есен Китап“ е да објавува книжевни дела од сите јазици, под заеднички нслов „Литература на светот“…, истакна Нихал Инвер, уредничка на „Есен Китап”.
Романот „Зад аголот” беше објавен во 2012 во издание на „Магор“. Се работи за прозна книга со сложена градба и динамичка, речиси филмска нарација во чии рамки се развиваат девет приказни, и хронотоп кој има опфат од јонската и атичката антика, до современа Европа, Азија и Америка, со фокус на 1999 година, симболички последната година на стариот век и епоха.