Мандолинските оркестри од Пехчево, Берово и Русиново и хорот од ООУ „Св. Климент Охридски“ од Делчево се пласираа на Републичките смотри за хорови и оркестри, кои годинава ќе се одржат во Кавадарци.
Ова е резултатот од денешните Регионални смотри на хорови и оркестри кој се одржа во ООУ „Ванчо Прке“ во Делчево, а на кој се натпреваруваа училишните хорови и оркестри од основните и средните училишта од Делчево, Берово, Пехчево и М. Каменица.
Членот на жири-комисијата, Горан Ќурчиски е задоволен од прикажаното на сцената.
– Сите оркестри и хорови имаа свој десетминутен настап со една задолжителна композиција и една по избор. Овие смотри се всушност мотивација на учениците за плодна работа на полето на предметот музичко воспитување. Целта на одржувањето на Регионалните смотри е да се унапреди музичкото образование, но и да се согледа квалитетот на работата на училишните хорови и оркестри, истакна Ќурчиски.
Училишните хорови и оркестри од Делчево досега имаат постигнато видни резултати на овие смотри. И минатата година училишниот хор од ООУ „Климент Охродски“ под раководство на професорот Дејан Ѓеоргиевски-Ѕене на Региоанлните смотри го освоија првото место, а на Републичките смотри беа третопласирани.