Во Младинскиот културен центар вечер од 20 часот ќе биде доделена првата годишна награда за стрип „Лифт“. На изложбата и во публикацијата која е отпечатена по тој повод ќе бидат претставени деветте стрипови кои од 30 пристигнати се оценети за најдобри во 2018 година.
Нивни автори се: Никола Панов, Стефан Николовски, Оливер Цветковски, Лазар Ангелов, Виктор Гаврилoски и Магдалена Мирческа, Јована Велинова, Кристина Неделковска, Марија Николаевска и Владимир Трајановски.
Иницијатори на наградата „Лифт“ се книгоиздателството „Темплум“ и ОХО, а целта е да се промовираат и афирмираат овдешните стрип-автори и да се унапредува стрипот кој, според организаторите, кај нас е запоставен медиум.
За конкурсот и за наградените ќе зборува Никола Гелевски, член на жирито и уредник на „Темплум“. Покрај него, членови на жирито се и Јана Јакимовска, Ласко Џуроски и Владимир Битољану.
Прворангираниот автор ќе добие 300 евра, вториот 200, а третиот 100 евра. Донатор на првото доделување на наградата „Лифт“ е Град Скопје.