По повод 55 години творештво и 77 години од раѓањето на Љубиша Георгиевски, доајенот на македонската филмска и театарска уметност, на 28. јануари, среда, во 12.00 часот во киносалата на Кинотеката на Македонија ќе бидат промовирани ексклузивното ДВД издание со дигитализираниот филмски опус на Георгиевски и книгата „Театарски магии – Мнемопис“ со текстови на авторот. Свечени обраќања до присутните на промоцијата ќе имаат д-р Елизабета Канческа-Милевска, Министер за култура на РМ, и м-р Мими Ѓоргоска-Илиевска, Директор на Кинотеката на Македонија.
Комплетот од пет ДВД-ја ги содржи долгометражните Под исто небо (1964), Планината на гневот (1968), Републиката во пламен (1969) и Цената на градот (1970), краткометражните Не (1966) и Патека (1967), како и документарниот филм HIC TRANSIT GLORIA MUNDI / Хераклеа (1974), а произлезе од проектот на Кинотеката на Македонија за дигитална реставрација на најдоброто од македонската национална филмска продукција – проект во чии рамки досега беа дигитализирани и издадени филмовите на Столе Попов и на Браќата Манаки, а во тек е дигитализацијата на филмските остварувања на Милчо Манчевски.
ДВД-јата со филмови на Љубиша Георгиевски пред публиката ќе ги промовира Илинденка Петрушева, филмолог и филмски критичар, додека за книгата на Георгиевски ќе говори проф. д-р Јелена Лужина, театролог и приредувач на ова книжевно издание за „Макавеј.“