Признанието „Свечена грамота“ денеска и беше врачено на Мими Ѓоргоска – Илиевска, директор на Кинотеката на Македонија, за придонес во популаризацијата на бугарската култура и исклучителен придонес во продлабочувањето на културната соработка меѓу Македонија и Бугарија.
Наградата, која ја доделува министерот за култура на Република Бугарија, и ја врачи бугарскиот амбасадор во Македонија Иван Петков.
Плакетата се доделува по повод 24 Мај – Денот на словенската писменост, кој во Бугарија се одбележува и како ден на бугарската просвета и култура. Ова признание е значајно и зашто се доделува во годината кога Бугарија ја слави 100-годишнината од својата кинематографија.
Амбасадорот Петков истакна дека Мими Ѓоргоска-Илиевска, како личност и експерт, е долгогодишен пријател и познавач на бугарската кинематографија.
– Придонесува за реализација на проекти за научни истражувања и за проследувањето и зачувувањето на културното наследство во областа на кинематографијата на нашите две соседни држави, на Балканот и на Европа, рече Петков.
Директорката Ѓоргоска-Илиевска истакна дека значи да се добие признание за сработеното.
– Секое признание значи и уште поголема одговороност и обврска да се продолжи и понатаму, да се работи на заштитата на филмското наследство и на негова презентација. Ова призние ги потврдува, пред се моите заложби и заложбите на Конотеката на Македонија. Покрај нашата основна дејност, заштита на националното филмско наследство, континуирано да ги продлабочуваме и развиваме меѓународните релации со колегите од сите архиви, како од Европа и от светот, рече Ѓоргоска-Илиевска.
Да успеваме, нагласи таа, да ја презентираме македонската кинематографија надвор од Македонија и да ги претставуваме различните кинематографии во Македонија, да ги воочуваме нашите сличности и разлики, се во интерес на промоција на филмското наследство. Таа им се заблагодари на колегите од Кинотеката на Македонија.
Биографијата на Ѓоргоска-Илиевска ја претстави Димитар Христов, директор на Културно-информативниот центар на Бугарија во Македонија. Тој потенцира дека Ѓоргоска-Илиевска е почитуван експерт и колега во Македонија и во Бугарија и придонесува за долгогодишната културна соработка и пријателство меѓу Македонија и Бугарија.
Во Кинотеката на Македонија вечер од 20 часот ќе има специјална проекција на филмот „Иконостасот“ од 1969 година, во режија на Христо Христов и Тодор Динов.
Присутните со едноминутно молчење и оддадоа почит на новинарката Сузана Тодоровска Павловска, која пред неколку дена загина во сообраќајна несреќа кај ТЦ „Зебра“.