Примерок од првото издание на „Хари Потер и каменот на мудроста“, кој содржи белешки и оригинални илустрации од авторката Џоуан Роулинг, беше продаден синоќа на аукција во Лондон за 150 илјади фунти.
Аукциската куќа Садеби соопшти дека романот преминал во рацете на анонимен купувач, кој наддавал преку телефон.
Меѓу белешките на авторката се и напомени за процесот на пишување и дел од првиот нацрт на романот. Еден од нив покажува и како авторката на бестселерот го измислила спортот „квидич“.
Книгата содржи 22 илустрации од авторката – цртеж на Хари Потер како бебе додека спие на куќниот праг и слика од Албус Дамблдор од „чоколадна жаба“, кој се спомнува во книгата.