Во Кинотеката на Македонија вечер од 19.30 часот ќе биде отворена изложба од циклусот „Македонскиот Дон Кихот“ и премиера на истоимениот документарен филм на ЕФА Продукција за македонскиот сликар и професор Владимир Георгиевски (1942-2017) режиран од Константин Плевнеш.
– Изложбата ќе ја отвори Климе Коробар од асоцијацијата „Икон“, а настанот ќе биде придружен и со изведба на композиции на Шуберт, еден од омилените композитори на Владимир Георгиевски, во изведба на Фјола Исмаили – виолончело и Дарко Мариновски – пијано, соопшти ЕФА Продукција.
Изложбата посветена на четиридецениското истражување на темата Дон Кихот, инспирирана од Сервантес, во втората половина на 2018 година се очекува да биде презентирана заедно со документарниот филм во галерија во Мадрид.
Документарниот филм ќе има уште една проекција во Кинотека, на 4 јануари 2018 година.