Во рамките на проектот „Триаголници на соработка“ од 27 до 31 јули во Преспа ќе се организираат еднодневни тури наменети за деца над седум години од Преспа, Крани и Подмочани и од нивната околина.
Активноста насловена „Дестинација – креација“ ја реализира Буден театар, а најмладите преку креативни активности ќе имаат можност да ги истражуваат природните убавини и атракции во Преспа.
Учеството, како што соопшти Општина Ресен е бесплатно, со задолжително пријавување. Децата ќе бидат придружувани со обучени и искусни фасилитатори и професионалци.
– Услов за учество е пријавување на e-mail и писмена согласност од родител за снимање. Сите тури ќе бидат снимани и емитувани. Заинтересираните може да се пријават на: trianglesofcooperation@gmail.
„Дестинација-креација“ е продолжение на активностите кои преку проектот „Триаголници на соработка“ Буден Театар ги спроведува во Преспа и Кратово. Досега биле извршени обуки за реализација на креативни програми за деца, спроведени се 42 креативни работилници за деца и беа прикажани шест гостувања на претстави на Буден Театар.
Проектот е поддржан од Швајцарска амбасада во Скопје, а локални партнери се општините Кратово, Ресен и Пробиштип, Музејот на град Кратово, Домовите на култура во Кратово и Ресен, основните училишта во селата Крилатица, Злетово, Крани и Подмочани, како и граѓанските организации Акција Плус – Ресен, Изида – Ресен, и Регионален центар за одржлив развој.