Во Младинскиот културен центар вечер ќе биде отворен првиот Зимски поетски фестивал на Струшките вечери на поезијата.
Фестивалот ќе трае до 11 декември, а во фокусот ќе бидат четворица врвни поети од земјава и странство. Тие ќе имаат можност преку предавања да го претстават своето творештво и да направат автопоетички осврт, да ги кажат своите ставови за творештвото, поезијата…
Учесници на новиот Зимски поетски фестивал се Мохамед Бенис од Мароко, Александар Шурбанов од Бугарија, Душко Новаковиќ од Србија и Виолета Танчева-Златева од Македонија.
Во рамки на програмата утре свое претставување ќе има мароканскиот поет Бенис, кој најпрво ќе одржи предавање на Филолошкиот факултет „Блаже Конески“, а вечерта ќе има поетски портрет и читање поезија. Следниот ден е посветен на поезијата на бугарскиот поет Шурбанов, петокот ќе биде резервиран за српскиот поет и преведувач Новаковиќ, додека последниот фестивалски ден е резервиран за добитничката на наградата „Браќа Миладиновци“ за 2015 година Танчева – Златева.
Учесниците на фестивалот ќе бидат објавени во едицијата „Плејади“ чие творештво ќе стигне до читателската публика.
Од СВП најавуваат дека идната година Зимскиот фестивал ќе се одржува и на универзитетите во Битола, Штип, Охрид и Тетово каде ќе се организираат дел од активностите.