Шеесет и второто издание на фестивалот Охридско лето ќе биде отворено вечерва на Античкиот театар во 21 часот со четирите светски познати тенори од Италија – Алесандро Косентино де Акриса, Федерико Сера, Џовани Марија Палмија и Уго Тарквини. Италијанските уметници ќе настапат под диригентската палка на Лоренцо Бицари, придружувани од Оркестарот на Националната опера и балет на Република Северна Македонија.
Охридско лето за отворено ќе го прогласи претседателот Стево Пендаровски, кој е и покровител на фестивалот, а ќе се обрати и министерката за култура, Бисера Костадиновска-Стојчевска. Честа да ја пренесе уметничката порака годинава ја има композиторот и музички уметник Горан Начевски. По традиција, свеченото отворање ќе биде проследено со интонирање на фестивалската химна, палење на фестивалскиот оган и богат огномет над охридското небо.
На годинешното 62. издание љубителите на уметноста ќе имаат можност да уживаат во 36 концерти, девет театарски претстави и 6 настани во дополнителната програма. Од денеска до 20 август, на отворените сцени Антички театар, Долни Сарај, предворје на црквата „Света Софија“, како и во самата црква „Света Софија“ и во Центарот за култура, ќе настапат над 1.000 уметници од 25 земји во светот.
Најреномираната манифестација со интернационален предзнак, Охридско лето, која е дел од Европската асоцијација на фестивалите, се гради и надградува под покровителство на претседателот, со финансиска поддршка од Владата и ресорното Министерство за култура и со помош и поддршка од Општина Охрид, генералниот спонзор „Македонски телеком“, како и од многубројни спонзори и помагатели, информира организаторот.