Галеријата „Остен“ во соработка со светската дата-база за уметници Артфактс.нет од Берлин ќе развие онлајн-платформа што ќе биде прва македонска глобална заедница за уметност.
Целта е меѓусебно поврзување на македонските ликовни уметници и на сите други субјекти во уметноста, како куратори, галеристи, колекционери и љубители на уметноста. Во изработка на платформата „Остен“ ќе биде помогнат од Артфактс.нет (www.artfackts.net) која е меѓу најголемите бази со податоци и анализи за водечките интернационални уметници.
Извршната директорка на „Остен“ Корнелија Конеска рече дека идејата е разработувана подолго време, а целта е вклучување во модерните текови.
– Веќе не е работа на избор дали ќе бидеш на интернет, дали сакаш или не сакаш, процесите во глобалниот свет едноставно го наложуваат тоа и ние решивме што поскоро да фатиме чекор со нив. За таа цел направивме проект, ги избравме нашите партнери за изработка на софтвер – компанијата „Форвард“ од Македонија и ги поканивме Артфактс.нет да соработуваме на проектот зашто има допирни точки меѓу нивната работа и она што ние планираме да го направиме. Платформата ќе претставува можност за онлајн-интеракција помеѓу создавачите на уметност и консументите на уметност, изјави Конеска.
Таа појасни дека уметниците во платформата ќе бидат поделени во повеќе нивоа – од уметници-ентузијасти, преку професионалци до етаблирани легенди во уметноста. Покрај творците на уметност, ќе бидат вклучени и оние кои неа ја примаат – кураторите, историчарите на уметноста, уредници на списанија за уметност, колекционери и љубители на уметноста кои сакаат да бидат во тек. Тие ќе имаат можност да даваат оценки и коментари за она што ќе го видат на платформата.
Глобалната платформа Артфактс.нет функционира во Берлин од 1999 година. Содржи информации, квалитативни и квантитативни, за уметници во светот (современи и починати), за нивни дела, целосна евиденција на изложби од првиот Зимски салон во Париз во 19 век…и врз база на сето тоа се прави ранг-листа од која може да се види позицијата на одреден уметник на глобалната сцена.
– Мотото на Артфактс.нет е дека историјата на уметноста може да се следи преку историјата на изложбите. Соработката ни е од големо значење. Ние ќе се поврземе технички со нив и уметниците што ќе бидат на платформата на „Остен“ ќе може да се рангираат преку ранг-листата на Артфактс.нет, додаде Конеска.
Директорот на Артфактс.нет Марек Класен изјави дека „Форвард“ и „Остен“ прават напреден проект за сорабтка на уметниците и е задоволен што во неговото креирање помага Артфактс.нет што тој го раководи од 2001.
– Во ерата на глобализација е важно да се биде поврзан и да се соработува со странски уметници, особено ако сте од мала земја. Платформата ќе биде место за естетски натпревар на делата на македонските уметници со уметниците од светот, рече Класен.