Oбјавена книгата со хаику поезија „Стрмец во хаику скротен“ од Пере Ристески
Скопје, 4 октомври 2018 (МИА) – Излезе од печат книгата со хаику поезија „Стрмец во хаику скротен“ на авторот Пере Ристески.
Во книгата се поместени 70-тина хаику песни, кои тематски се однесуваат на ветерот Стрмец карактеристичен за охридскиот регион.
Книгата е поддржана од Општина Охрид, а е во издание на ПНВ Публикации од Скопје.
– Авторот на оваа книга, е вистински хаику-мајстор кој ги води читателите низ тајните на хаикуто експериментирајќи со него, модернизирајќи го и доближувајќи го културолошки до македонското читателство, велат од издавачката куќа.
Пере Ристески е роден 1977 година во Струга. Автор е на девет книги поезија, од кои пет со хаику поезија. Неговата хаику поезија е преведена на бројни јазици и редовно се објавува во книжевни списанија и антологии во Европа и светот. Добитник е на значајни интернационални признанија, пофалници и дипломи.