Пред неколку дена беше објавен првиот инсерт од филмот „Дара од Јасеновац“, српскиот кандидат за Оскар на Предраг Гага Антонијевиќ, а сега може да се погледне и неговиот официјален трејлер.
Трејлерот е увертира за американската дистрибуција на филмот, која ќе започне на 5 февруари.
„Дара од Јасеновац“ е емотивно силна драма која се занимава со историска траума, нудејќи, пред сè, почит кон жртвите. Темата е исклучително значајна, болна и трауматична, со тоа што филмот ја избегнува стапицата на будење на духовите од минатото, бидејќи не е ставен во политичкиот дискурс. Остварувањето не се занимава со бројки и општи места, туку со индивидуални судбини, со што се создава многу сугестивна слика за трагедијата што се случила, се вели во српските медиуми.
Премиерата на „Дара од Јасеновац“ во Белград симболично е закажана за 22 април, датумот што ја одбележува 76-годишнината од пробојот на последните затвореници од логорот Јасеновац. По премиерата во Белград на 22 април, филмот ќе биде достапен во кината низ цела Србија.