НУ Центар за култура-Битола во своето Арт-кино ќе приреди циклус филмови од германска продукција снимени според бајките на браќата Грим.
Манифестацијата „Волшебниот свет на браќата Грим“ ја организираме во чест на јубилејните 200 години од првото објавување на збирката „Бајки за деца“ од браќата Грим, информираат од оваа национална установа.
– Првата проекција ќе биде утревечер со почеток во 18 часот, кога ќе биде емитуван филмот „Пепелашка“ во режија на Уве Јансон, снимен во 2011 година. Кино проекциите на петте германски филмови снимени според бајките на Вилхелм и Јакоб Грим претставуваат задолжителна лектира за секое дете во светот, дел од светското културно наследство но и во пишуваното културно наследство на УНЕСКО, истакна Љупка Коларова-Пајевиќ, стручен соработник во НУ Центар за култура-Битола.
Во периодот од 4 до 10 февруари за најмладите битолчани во Арт-кино на НУ Центар за култура на репертоарот ќе биде филмот „Пепелашка“, во периодот од 11 до 17 февруари ќе се емитува филмот „Масата, магарето и стапот“, а од 18 до 24 февруари филмот „Госпоѓа Холе“.
Во текот на месец март ќе бидат емитувани „Бременските музиканти“ и филмот „Снежана“ со што на 10 март завршува оваа манифестација, организирана во соработка со Кинотека на Македонија, Гете Институт и Ал Сат Телевизија, информираат од НУ Центар за култура-Битола.
– Сите проекции почнуваат во 18 часот, а во сабота и недела ќе биде организирано кино-утро кое ќе почнува во 11 часот. Во меѓувреме подготвуваме детски Фестивал за слика и филм, а за возрасните ќе приредиме Циклус филмови на култниот шпански режисер Карлос Саура, најави Коларова Пајевиќ.