Заменик-министерот за култура Драган Недељковиќ денеска и утре ќе учествува на Меѓународната конференција посветена на борбата против антисемитизмот во Киев, Украина.
Конференцијата се одржува по повод одбележувањето на 100-годишнината од судењето на Менахем Мендел Беили, чие име честопати се споменува како симбол на антисемитизмот.
На дводневната конференција, која е во организација на Украинскиот еврејски комитет, освен претставници на Американскиот еврејски комитет, Лигата против клевета и Светскиот еврејски конгрес, ќе учествуваат и повеќе видни личности, академици, политичари и еврејски лидери од целиот свет.
Настанот е под покровителство на украинското претседателство со ОБСЕ, чии приоритети се промовирање на недискриминацијата и толеранцијата.