Наградата „Прозни мајстори“ на издавачката куќа „Феникс” и Фондацијата „Македонија презент” им се доделува на Роберт Алаѓозовски за романот „Готен”, на Игор Крајчев за романот „Воини и херои” и на Васил Тоциновски за книгата раскази „Сушачко попладне“.
Одлуката ја донесе жири во состав Христо Петрески (претседател), Панде Манојлов и Виктор Шеќеровски (членови), а на наградените ќе им биде врачена утре во аутлет-книжарницата „Феникс“. Со доделување на наградите „Феникс“ ќе ја почне манифестацијата „Фестивал на чајот и читањето”, кој ќе трае до 3 март.
Алаѓозовски во романот „Готен“ го проследува усното предание за доаѓањето на Сасите во Македонија, од нивното доселување на Балканот во 13 век, привилегиите, но и напорната рударска работа што ја вршеле под средновековните владетели…- Приказната за кланот Готен е приказна која ги допира и современите културни и современи дебати за тоа како се врши трансгресијата на културниот и етничкиот идентитет, како се создава и заслужува националниот идентитет, како се формираат, како оперираат и како престануваат да важат културните и етничките разлики, соопшти „Феникс“.
Во „Воини и херои” од Игор Крајчев, издание на „Панили”, станува збор за целосно измислена земја, со животни, езера, народ, јазик, енциклопедиски измислена земја која се вика Креидон. – Романот е псевдосказна, а сказната е подготовка (иницијација) за животот. Животот е пак борба со злото. Кој ќе падне, ќе стане ѕвезда на небото над Креидон, соопшти „Феникс“.
Збирката раскази „Сушачко попладне” на Тоциновски е издание на „Феникс”. Напишана е во Риека и, како што информира издавачот, создадена е во специфичниот далматински и медитерански амбиент и ги поседува и донесува карактеристиките на тоа поднебје. – Вистинска магија се времето и просторот на чудесната Риека. Градот не признава ни човечки ни цивилизациски граници, а човекот е универзална честичка. Магијата на неговата убавина во своето срце го собира целиот свет…, соопшти „Феникс“ за збирката раскази „Сушачко попладне“, која прво е објавена на хрватски јазик.
Досегашни добитници на наградата „Прозни мајстори” се: Ермис Лафазановски, Игор Исаковски, Горјан Петревски, Ким Мехмети, Александар Прокопиев, Томислав Османли, Трајче Кацаров и Блаже Миневски.