Годинешното издание на фестивалот „Охридско лето“ продолжува со музичката програма, со вечерашниот концерт на флејтистот Страшо Темков, во пијано придружба на пијанистка Наташа Вршкова.
Страшо Темков е еден од најуспешните македонски музички уметници од својата генерација. За време на студиите на Факултетот за музичка уметност во Скопје и последипломските студии на Музичката Академија „Панчо Владигеров“ во Софија соработува со реномираните уметници и педагози од Македонија и Балканот и добива повеќе награди на државните и меѓународни натпревари.
Подолг период е прв флејтист во Македонската филхармонија, а остварува и бројни солистички и камерни настапи на концертните подиуми со оркестри, со рецитални програми, како учесник на реномираниот Македонски дувачки квинтет и други камерни состави.
Страшо Темков има настапувано на познатите фестивали во земјава и странство како „Охридско лето“, „Скопско лето“, „Денови на македонска музика“, НИМУС – Србија и други. Тој е меѓу малубројните македонски уметници кои настапиле во „Карнеги-хол“, една од најпрестижните светски концертни сали. Страшо Темков има издадено два компакт-диска со разновиден репертоар. Покрај уметничката дејност тој активно се занимава со педагогијата како професор на Факултетот за музичка уметност во Скопје.
Марија Вршкова се вбројува меѓу најактивните и сестрани македонски музички уметници од помладата генерација – како солист, камерен музичар, пијано соработник кој настапува со врвни македонски и светски уметници на концертните и фестивалските подиуми во повеќе европски земји и САД.
Покрај бројните ЦД-а како пијано соработник, го снимила и своето прво солистичко ЦД со македонска музика за пијано. Марија Вршкова е добитник на наградата за специјално уметничко достигнување како пијано соработник на интернационалниот натпревар „Охридски бисери“ и наградата „Виртуози“ за најдобриот изведувач во 2012 година.
Целовечерниот концерт на Темков и Вршкова ќе се одржи во катедралната црква „Света Софија“ со почеток од 21 часот. На програмата се дела на Дворжак, Хју, Поп, Рутер.