На сцената на Народниот театар „Јордан Хаџи Константинов-Џинот“ во Велес синоќа беше изведена претставата „Приказни од шестиот кат“ според раскази на Драги Михајловски, во режија на Деан Дамјановски.
Претставата е меѓу 13-те во конкуренција за награда на 50. Македонски театарски фестивал „Војдан Чернодрински“ во Прилеп и наместо таму беше изведена во Велес, а поголем дел од публиката беше донесена со пет автобуси од Прилеп.
Прилепската театарска публика беше одушевена од новиот објект на Велешкиот театар, како и од претставата на ансамблот од Велес, во која главната улога ја игра актерот Васил Зафирчев. По два и пол часа игра на сцена, екипата беше наградена со громогласен аплауз.
Практиката да излегува од Прилеп МТФ ја почна лани кога публиката отпатува на сцената на МНТ во Скопје.