Поезија од Јовица Тасевски–Етернијан беше објавена во интернационалното списание „Модерна литература“ (Modern Literature), кое е фокусирано на најновите трендови во современата светска книжевност и има за цел на читателите да им ги претстави глобалните тенденции во поезијата и прозата.
Во објавениот прилог е наведено дека Јовица Тасевски–Етернијан е истакнат поет, книжевен критичар и есеист од Република Македонија чии поетски достигнувања се меѓународно признати и дека ја има добиено наградата „Восхитувачки поет“ за исклучителен придонес во поезијата.
Истовремено, од редакцијата се истакнува дека песните на Етернијан „донесуваат уникатна атмосфера и визија на светот, недопрени од светските превирања; тие бараат сосредоточено внимание за да се разоткријат нивните скриени значења“.
Во истото списание претходно беше објавен извадок од романот „Но-уи“ на Лидија Димковска што на англиски јазик го преведе проф. д-р Кристина Крамер.
Во белешката за Димковска, пак, се истакнува дека таа има добиено повеќе награди, вклучувајќи ја и Наградата за литература на Европската Унија, како и дека освен романи има објавено и неколку поетски книги. Романот „Но-уи“ беше избран за македонски кандидат за престижната награда „Балканика“.